Versione latino, AIUTO per favore!

[denisarapaj22]

Heracleae urbis initia, ut Iustinus tradit, admirabilia fuerunt.
Nam, cum gravis pestilentia Boeotiae incolas vexaret nullumque inveniretur remedium ut morbus depelleretur, Boeotii, contione advocata, statuerunt ut Delphos legati mitterentur oraculum consulturi de morbi causa.
Interrogantibus oraculum morbi causam non patefecit sed imperavit ut fines suos, morbo corruptos, relinquerent, omnia sua secum auferrent, in Ponti regionem se transferrent et apud Pontum Euxinum coloniam Herculi sacram conderent.
Oraculi responso cognito, Boeotii, omnibus rebus suis paratis, cum senibus, mulieribus puerisque domos agrosque reliquerunt et post longam periculosamque navigationem in Pontum pervenerunt, ubi ab Herculis nomine urbem Heracleam condiderunt. Et quoniam fatorum auspiciis coloni in illam regionem delati erant, brevi tempore nova urbs tantum crevit, ut ceteras Ponti urbes superaverit.